Act 6 | KYG | STEP | Yesu ge'amo ne'afiya vaya'mo mago'e mago'e hu'a lusi vaya'mo afole ai'nage'apae'mo Galiki apakemo ne'aiya Yu vaya'mogimo Himulu apakemo ne'aiya Yu vaya'aife'mo, Kogu a'netimo muki afina'ae afina'ae'mo ali'a fako hu'a ne'apamiya monifati'mo no'aliye, hu'a ge hapau'nae.

Acts 6

Apa vaya'mo hapa maesaya vaya'mo lekana pai'a apate'naya gemae

1 Yesu ge'amo ne'afiya vaya'mo mago'e mago'e hu'a lusi vaya'mo afole ai'nage'apae'mo Galiki apakemo ne'aiya Yu vaya'mogimo Himulu apakemo ne'aiya Yu vaya'aife'mo, Kogu a'netimo muki afina'ae afina'ae'mo ali'a fako hu'a ne'apamiya monifati'mo no'aliye, hu'a ge hapau'nae. 2 Inagi tuolofu'a apa vaya'mogi muki ge'amo ne'afiya vaya'aife'mo ge hu'nage'a e'nage'apae'mo, Lagaemo fiku Goti ge'amo aeta hakalo huta hapa nepauna ali'yatimo ataleta monimo alita fako huta apamisunana kanale osugiye. 3 Vayatimogitapae, hu'a, Lapakaitapige'mo lapakaepati mago seveni'a vaya'mo lekana paitapa apateyo. Kanale vaya'mo Goti Auneme'amo'mo apaipafi'mo havai te'nisiya vaya'mogi alagepa hu'a apakesa ne'afiya vaya'mo lekana paita apateteta ali'a fako hu'a apamisaya ali'yate'mo apavaleta apategaune. 4 Lagaemo magoke ali'ya'ageke alita mai'netae'mo muki afina'mo nunumu'mo huge Goti gemo aeta hakalo huta hapa paige huta maigune, hu'a hapa pai'nae. 5 Hapa pai'nage'apae'mo muki vaya'mogimo amuse hute'apae'mo, kanalene, hu'a hute'a Sitiveni'a Gotife'mo alagepa huno agesa afino fatago hu'nigeno Goti Auneme'amo'mo aipafi'mo havai te'niya vekagi Filipi'agi Polokolasi'agi Naikena'agi Taimoni'agi Pamenasi'agi Nikolasi'agi hu'a lekana pai'a apate'nae. Nikolasi'a Atiyoki kotega vekamo Yu vayapati vekamo o'mai'niya'monanafa Yu mono gemo afiteno Yu vayapi'mo eno mai'niya vekae. 6 Apakaemo apavaleli'e'a apa vaya'ai apaulagale'mo he ti'nage'a apakufale'mo apaya'mo male'ne'a nunumu'mo hu'a apate'nae.

7 Inagi Goti ge'amo'mo muki aupilagamo aino atagu faeno uneno hu'niye. Yulusalemu taonifi'mo mai'naya vayapati'mo Yesu ge'amo ne'afiya vaya'mo mago'e mago'e hu'a afole ai'nae. Mono hu'a ne'apataya vaya'mo asole vaya'mogimo apakesa afi'a fatago hute'a akame hu'nae.

Sitiveni'a kalavusi hu'a ate'naya gemae

8 Sitiveni'a agesa afino fatago hu kava'e lokiya'a'e'mo aipafi'mo havai te'nigeno no'agaya agufa lokiya aune kava'mo Yu vaya'aitegamo hu'niye. 9 Mago vaya'mo Yu vaya'ai mono nopi'mo ali'a anupa hu'a mai'nae. Ani mono no'mo agi'amo hane'niyana vaya'mo kalavusi ali'ya'mo ne'aliyategati'mo hatu mae'a apate'nage'a afa'a u'naya vaya'ai mono none, hu'a agi ate'nae. Ani vaya'mo Yu vayapati'mo Sailini kotega vaya'e Alekasani kotega vaya'e'mo mai'nae. Apakaegi Silisiya kotega vayanagi Esiya kotega vayanagi hu'a Sitiveni'a hu'niya geleti'mo he ti'a ge vai'nae. 10 Goti Auneme'amo'mo alagepa agesa afi ya'mo alino ami'nige'a Sitiveni'a hu'niya gemo ae'a o'agase'nae. 11 Apakaemo mago vaya'mogi e'a aigofe gemo hisayafe'mo kesi kate'mo u'a ali'a he ti'a apate'nage'a e'a hapa pai'apae'mo, Ago afi'nonana Mosese'e Goti'efe'mo huno faipa huno anate'niye, hu'a hapa pai'nage'a 12 afite'apae'mo muki vayanagi yagai'a ne'apataya vayatama vayanagi ke'aepa gemo ali'a apaya ne'malaya vayanagi hu'a he ti u'a Sitiveni'mo atafau'a kanisole vaya'aitegamo avaleli'a u'nae. 13 Apakaemo mago vaya'mogimo aigofe faigoko gemo hisayafe'mo apavaleli'e'a apate'nage'apae'mo, Ani vekamo'a lagae mono no'e ke'aepa gee'mo huno faipa huno ne'ate. 14 Ge'amo afi'nonana ani Nasalasa taonifi vekamo Yesu'a alopa mono notimo alino halagape vaiteno Mosese ke'aepa gemo alino ataleteno alu gemo malegaiye, huno hu'nigeta afi'none, hu'a hapa pai'nae. 15 Kanisole vaya'ai nopi'mo mai'naya vaya'mogimo aulu hae'a age'nayana Sitiveni augosamo'mo enisole vekamo augosagana huno hane'nige'a age'nae.